Kerja Rani Pengataken Bujur Arah Ulih Pendahinta
LATAR BELAKANG
Wari raya kerja rani merupaken sada pengataken bujur man Dibata, erkite kiteken enggo ipasu pasu Dibata dahin dahinta, adi nai i tengah tengah bangsa Israel gandum enggo mbuah ras mereken hasil man bangsa Israel. I tengah tengah kalak karo nai, ija pendahin mayoritas kujuma janah nuan page serentak kerina.
APLIKASI
Nggejap Dibata enggo masu-masu page sini isuan janah erbuah bage pe rani. Erkiteken si e tergejap pasu-pasu Tuhan, sebab adi lakin ban Tuhan labo berhasil page sini isuan e, kai i usahaken manusia adi la ipasu pasu Tuhan labo banci berhasil. Emaka setiap kali rani ibereken ulih rani e, 2 pelegan (2 kaleng page) persembahen man Tuhan sebagai pengataken bujur. Dasarna kita erbahan pesta kerja rani banci sibandingken ras Ulangen 16 : 9 -12, II Kor 9 : 6 -9.
Genduari kita mereken kerja rani arah ulih pendahinta ibas sada tahun lanai berbentuk page sebab lanai nari kita nuan page, tapi berupa sen, hasil pencarinta ntah ulih latihta, sebab sigejap ipasu pasu Tuhan pendahinta emaka iberekenNa ulih man banta guna kebutuhen kebutuhenta.
Emaka sirenung-renungken ras sidiskusiken ras keluarganta asa kai nge si patut si bereken man Tuhan rikutken pasu-pasu Tuhan ku tengah tengah keluarganta selama sada tahun enda. Ula kita mekarus mere man Tuhan sebab kalak simekarus mere man Tuhan labo ate Tuhan ngena. Si inget-inget kerina pasu pasu Tuhan, ras penampatna, keleng atena man banta, emaka siarihken ras anak jabunta asakai sipatut siakap kerja raninta, jenari sibaba ku Gereja.
