PJJ Tgl 02 – 8 JULI 2017

PJJ Tgl 02 – 8 JULI 2017

By Admin   9:42:00 PM

Siajar-Ajaren Radu Pentar

Mazmur 78 : 1-8

Tema : Siajar-Ajaren Radu Pentar.

LATAR BELAKANG

1.      Bangsa Israel eme bangsa siipilih ras siikususken Dibata guna jadi alatNa nehken keselamatan man kerina bangsa. Emaka selaku bangsa Tuhan, bangsa Israel arus nggeluh erkemalangan ras patuh ndalanken kai siiperentahkenNa. Gelah ibas bangsa Israel erkemalangan ras patuh ndalanken perentahNa, bangsa Israel nggo nehken tanggungjawabna peseh keselamatan nandangi kerina bangsa.

2.      Ibas rangka sie, ende-enden Asap enda nuriken kerna perbahanen-perbahanen Dibata singgo ipesehNa man bangsa Israel tupung bangsa Israel i Mesir ras ndarat i Mesir nari ku Taneh Kanaan. Ende-enden Asap enda bentukna pengajaren, gelah lit tanggungjawab kalak Israel guna nuriken man kesusurenna kerna perbahanen-perbahanen Dibata e. Alu bage kalak Israel banci meteh kerna perbahanen-perbahanen Tuhan si mejin siisehkenNa man bangsa Israel, janah mbiar ia ras nggit ndalanken perentah-perentah Tuhan. Bangsa Israel tuhu-tuhu jadi bangsa sierkemalangan man Tuhan. Alu kata sideban, bangsa Israel tek man Tuhan ras lanai jadi bangsa pemberontok bagi icidahken nini ninina ndube.

3.      Bangsa Israel arus jadi bangsa sierkemalangan man Tuhan ras ndalanken kerina perentah-perentahNa. Emaka la ngena ate Tuhan adi bangsa Israel jadi bangsa pemberontak man Tuhan. Sebab adi jadi bangsa pemberontak pasti ihukum Tuhan. janah enda me sijadi man nini nini bangsa Israel, i ja tupung bangsa Israel la megiken kata Dibata kerna muat leto asa cukupna, sebab lit si muat leto melala, emaka ipeturah Tuhan pinakit emaka nterem si mate (Kel. 16:14-20; Bil: 11:32-34). Bagepe tupung Musa i deleng Sinai, ndekahsa akapna Musa nusur i deleng Sinai nari, emaka ibahanna sada lembu emas jadi dibatana, ras atena mimpin ia ibas perdalanen ku taneh Kanaan. Lembuh emas e jadi gancih Musa selaku pemimpin, emaka ihukum Tuhan ia kerina (bdk. Kel.32; Bil.14:1-30; 16, 25). Bangsa Israel ibas kesusuren simbaru enda la banci bage. Emaka bangsa Israel arus megiken pengajaren Tuhan. Inti pengajaren e me nuriken kerna kuasa Tuhan ras perbahanenNa si mejin, bagepe tanda-tanda kuasa siilakoken Tuhan. bagepe hukumen Tuhan man bangsa Israel. Pengajaren enda arus iajarkan angkatan ku angkaten (generasi ku generasi). Kerina kuasa Tuhan ras perbahanenNa si mejin, bagepe tanda-tanda kuasa Tuhan, ras  hukumen Tuhan banci sioge ibas ayat 12-67).

4.      Kerina kuasa Tuhan ras perbahanenNa simejin, bagepe tanda-tanda kuasa Tuhan ras penghukuman Tuhan, tujunna guna nelamatkan bangsa Israel ras ngaloken pasu-pasu ibas Dibata nari. Emaka kerina enda arus ituriken ku generasi selanjutna.

5.      Pengajaren nggeluh ibas kepatuhen ras ndalanken pedah Dibata eme perentah Tuhan. Emaka bangsa Israel arus ndalanken perentah Tuhan enda. Jadi pengajaran enda labo terjeng nuriken perbahanen-perbahanen Tuhan singgo lewat. Tapi lebih asangken sie, gelah bangsa Israel banci meteh adi la nggit megiken kata Dibata, ihukum Dibata ia.

APLIKASI

            Lit piga-piga cara gelah kita banci jadi pentar eme arah ngoge (tulisan) ras megi (mendengar). Fungsi jadi pentar gelah kita banci ngelakoken simehuli singena ate Tuhan. Jadi salah adi terjeng meteh keadaan doni enda ras gelah la itokohi kalak ngenca.

            Lit sekalak pahlawan nasional gelarna Sam Ratulangi nina : Sitou Tou Tumo Tumou Tou si ertina manusia memanusiakan manusia. Jadi kita manusia bertanggungjawab ngajarkan man temanta manusia gelah temanta e jadi manusia, jadi pentar. Alu bage kita iajarkan gelah kita la jadi kalak egois. Pemeteh si lit bas dirinta arus ibagiken man kalak sideban.

            Adi kita pentar la saja negara jadi makmur, tapi pe negara e nggeluh ibas kedamen, keadilan ras mpraktekken keleng ate. Bagepe gereja nggeluh ibas kedewasaan kiniteken. Sebab fungsi gereja nehken kai singena ate Tuhan ibas doni enda, em siidalanken kita. Bagepe nggeluh kita ibas kerembaken man Tuhan. Janah silakoken kai singena ate Tuhan ibas kegeluhenta tep-tep wari. Emaka adi lit cuping begikenlah (bdk. Markus 4:23). Enda me sierbahanca malem ateta. Emaka mari kita siajar-ajaren ibas simehuli gelah radu pentar kita. Janah perlu siteh ibas kita mbagiken kepentarenta man kalak sideban, berarti kita nggo jadi pancur pasu-pasu Tuhan man kalak sideban. Tapi perlu siteh siimaksudken siajar-ajaren i jenda, la saja kita singajarken man kalak sideban, tapi pe kita nggit megiken pengajaren kalak sideban.

            Situhuna adi siperdiateken kai singgo ilakoken gerejanta (GBKP), khususna Perpulungen Jabu-Jabu (PJJ), je lit siajar-ajaren, sebab radu kita nuriken penggejapen.

            Perlu siteh ibas kita nehken siajar-ajaren, berarti kita saling membagi pemeteh ras pengelaman. Sebab siteh lit keterbatasan bas kita. Tapi pemeteh sidat kita arus ka sipraktekken ku bas kegeluhenta. Alu bage siajar-ajaren enda arus nggeluh ibas kiniteruken ukur.

            Jadi kalak pentar merupakan sura-suranta kerina, emaka mari kita nggeluh siajar-ajaren. Adi sinen ibas kamus Karo-Indonesia, tulisan Darwin Prinst, nina : Pentar bali ras pintar. Bahasa Karo Pentar, bahasa Indonesiana pintar.

Pdt. Steven Kumenit, STh.M.Min.

Read More

PJJ Tgl. 25 Juni - 1 Juli 2017

PJJ Tgl. 25 Juni - 1 Juli 2017

By Admin   12:08:00 PM

Tema : SEHKENLAH KEHAMATEN MAN TUHAN (Imamat 22:1-2, 31-33)

“Ola ipeterukndu gelarKu si badia; e maka mehamat lah perbahanndu nandangi persembahen si badia si ipersembahken bangsa Israel man bangKu. Aku kap TUHAN.”

Penjelasen Bahan Ogen & Renungen

Umumna melala Gereja-gereja arus utama (bagi GKI, HKBP, GBKP, GPIB, GKJ, rsd.) jarang ngerana soal persembahen entah pe katakenlah perduiten, berbeda ras Gereja-gereja aliran Kharismatik. Alasen si rusur ipake : sungkan, kurang sopan adi Gereja ngerana soal perduiten, entah pe, “pasti ada apa-apa di balik khotbah”, rsd. Tapi situhuna, Pustaka si Badia mbue ngerana soal persembahen, soal perduiten.

Ibenaken i bas Padan si Ndekah, asum Habil ras Kain nehken persembahen man Tuhan (Kej. 4), asum Jakub erpadan nehken persembahen persepuluhenna i bas kasa kai si ibereken Tuhan man bana (Kej. 28:22). Benaken si e, persembahen labo hanya sada kerelaan, tapi pe enggo sada kearusen (kewajiben) man Israel. I bas Kel. 25:2 jelas Tuhan sendiri merentakennca man Musa gelah kerina kalak Israel erbahan sada persembahen man Tuhan. Ertina, bangsa Israel nehken persembahen man Tuhan sebage sada kearusen si idalankenna alu kerelaan. Sabab tuhu-tuhu igejapina uga Dibata si tetap masu-masu kegeluhen bangsa enda, janah persembahen e iendesken sebage pengataken bujur man Tuhan. Allah memberkati dan umat berterima kasih. Ras i bas pengataken bujurna si iendesken man Tuhan rikutken pasu-pasu si enggo ibereken Tuhan bas geluhta sekalak-sekalak (Ul. 16:16-17). Labo hanya arah keriahen ukurta, tapi rikutken pasu-pasu si ibereken Dibata man banta. Sabab lit deba kalak mbue kel pemere Dibata man bana tapi meriah ukurna nehken persembahen (kolekte) 5.000 rupiah. Padahal situhuna ngasup ia nehken kolekte (persembahen) 50.000 rikutken pasu-pasu Dibata si seh man bana. Ertina, i je lit sikap menggo, erkiteken kebiasaan ras labo sigejapken maka Dibata nge situhuna ulu kerina sialoken kita, termasuk kesehaten, gegeh, kiniliten, dame sejahtera, rsd.

I bas bahan PJJ sekali enda ngerana kita kerna nehken kehamaten man Tuhan. Tuhan merentahken man Musa gelah Harun ras anak-anakna sebage imam banci tetap nehken kehamaten man Tuhan i bas kerina dampar kegeluhenna, secara khusus nandangi persembahen si badia si ipersembahken bangsa Israel man Tuhan. Adi la mehamat entah menggo i bas nehken persembahen berarti seri ras mpeteruk ras njuruken gelar Tuhan si badia. Arus iakui bangsa enda, maka Dibata nge Tuhan si badia, si enggo encidahken kuasa ras keleng ateNa arah mpedarat bangsa Israel i bas Mesir nari kenca 430 tahun itaban i Mesir (Kel. 12:40). Adi rikutken teksta (judulna “Kebadian Persembahen”) maka kebadian persembahen ibenai arah totalitas kegeluhen imam ras keluargana (bdk. Im. 21-22) si arus nggeluh bagi si ngena ate Tuhan. Imam sebage perantara umat ras Dibata subuk i bas nehken persembahen, mindo pengalemi dosa rsd., maka imam selaku si berhubungen langsung ras Dibata arus “badia” gelah ula sempat ncurnaken gelar Tuhan si badia.

Read More

PJJ Tanggal 08 - 14 Mei 2016

PJJ Tanggal 08 - 14 Mei 2016

By Admin   1:10:00 AM

Suplemen PJJ Tanggal 08-14 Mei 2016

Bahan: Johanes 16:12-15; Efesus 1:13-14
Thema: ”Kesah Siipadanken Jesus"

Kata Perlebe :

Kenca lima puluh wari kekeken Jesus, entah pe kenca sepuluh wari kenangkihen Jesus ku Surga, isuruh Dibata me Kesah Si Badia ku doni enda man murid-murid ras kalak si tek. Kerehen Kesah Si Badia e sue bagi si enggo ipadanken Jesus nina "Ialokenndu pagi gegeh asum Kesah Si Badia seh man bandu. Janah kam me pagi naksiken kerna Aku man kalak si deban, i Jerusalem, i daerah Judea ras Samaria seh ku belang-belang doni enda." (Perb Rasul 1:8). Penting kal peran Kesah Si Badia ibas penginjilen si la erbatas seh ku kerina bangsa ras belang-belang doni enda. Penginjilen akan menghadapi erbage-bage tantangen ras perbeben arah erbage-bage budaya, tradisi ras erbage agama ibas doni enda. Tapi murid-murid ras kalak si tek la banci ngadi entah cebuni ibas penginjilen e nari. Jesus pe atena gelah murid-murid ras kalak si tek berhasil mbaba enterem jelma nandai Ia ras ngakuken Ia jadi Tuhan ras Juruselamatna. (bdg Joh 3:16).

Pembahasen Teks :

Teks Johanes 16 enda ipeseh Jesus man murid-muridNa sebage persiapen man murid-murid sebab labo pagi Jesus lalap ras Ia janah enggo ndeher paksana Jesus nadingken ia kerina. Kenca Jesus lanai ras murid-murid pendahin pemberitan Kerajan Dibata arus iterusken murid-murid ras kalak si tek. Ibas pemberitan kata Dibata e tetap nge lit perbeben ras ancamen ibas doni enda nari. Perbeben e labo reh nahangna sebab nembeh ate doni enda nandangi kiniteken ras kesetian murid-murid ras kalak si tek man Jesus. (bdg Joh. 15:18,19). Ngidah kesuliten ras tantangen kiniteken si mberat e bagepe pemeteh ras pengalamen murid-murid si terbatas denga (perlu pendewasan kiniteken) e maka Jesus ngutus Kesah si Badia man murid-murid ras man kalak si tek. Murid-murid ras kalak sitek la banci kiam arah kerina kebiaren ras ancamen ibas doni nari, tapi arus iadapi. Kata Dibata ras kekelengen Dibata arus ipeseh man nembeh ate doni e.Kerna ngadapi perlawanen ibas doni enda nari Jesus nehken padanNa niNa: "Kusuruh pagi penampat si reh i bas Bapa nari ndahi kam. Ia kap Kesah si ncidahken kebenaren Dibata. Adi enggo pagi Ia reh, Ia kap si ersaksi kerna Aku". (Joh.15:26). Kesah Si Badia naksiken kerna Dibata Bapa ras Jesus Kristus, guna ngelawan kuasa doni. Man murid-murid Jesus mere perentah: "Kam pe arus ngerana kerna Aku, sabab tangtangna nari kam ras Aku." (Joh. 15:27). Kesah Si Badia e labo erdahin si sada tapi Kesah e erdahin arah/ras murid-murid, mere penampat; dorongen, gegeh ras kinipangen naksiken kerna pengalamen kinitekenna ras ngajarken pengajaren si enggo ipeseh Jesus man baNa. Murid-murid perlu i kawali gelah ula tertuktuk (tersandung) ibas siding si iblis (doni) nari. Ula lit si kiam nadingken Jesus (nadingken pelayanen ras kiniteken). (bdg. Mat. 26:31).

Kesah Si Badia e pagi mpetangkas pemeteh doni enda kerna dosa, kerna ise si benar bagepe kerna ukumen si reh ibas Dibata nari. (bdg Joh. 16:8). Adi la arah penampat Kesah Si Badia manusia pentang, la erpengidah kerna kebenaren ras la erpemeteh kerna kebenaren bagepe la ergegeh guna ndalankenca. Adi la arah penemani ras pengajari Kesah Si Badia manusia papak ibahan doni enda.Masa pelayanen Kesah Si Badia labo babak baru pelayanen ibas Dibata nari, tapi kelanjuten pelayanen kenca Jesus mpetangkas kemulian ras kebenaren Dibata man doni enda. Masa pelayanen Jesus ran Kesah si Badia labo terputus tapi erkelanjuten, ersada, sebab kai si iberitaken ras ilakoken Kesah Si Badia rehna ibas Dibata Bapa nari si isehken Jesus. Ibas pelayanen Jesus ras Kesah Si Badia ipelimbaruiNa geluh manusia, ibereNa gegeh guna ngelawan dosa ras naluken kuasa si iblis. Lebih pe asa si e maka ibas pendahin Kesah si Badia ipetangkasNa pe kerna wari wari si reh, gelah kalak si tek tetap nggeluh ibas pengarapen ras kiniteken kerna kepastin keselamaten.Kesah Si Badia ersaksi kerna kai si ibegina ibas Dibata nari, jadi Kesah Si Badia e ersaksi ibas kiniersadan ras Bapa bagepe Jesus Kristus. Labo lit lainna entah pertentangen atara pengajaren Jesus ras Kesah Si Badia. Pendahin Kesah Si Badia e jadi tanda ras jaminen man kalak si tek maka sialoken me kai si enggo ipadanken Dibata, maka arah pendahin Kesah Si Badia ijagaiNa penebusen si enggo ilakoken Jesus i das kayu persilang.Kehadiren Kesah Si Badia e labo erpaksa-paksa, la ibatasi ruang ras waktu. KehadireNa labo itentuken manusia tapi bekas penuruh kekelengen Dibata Bapa. Kehadiren Kesah Si Badia e bebas kap, emaka manusia labo banci membatasi kehadirenNa. Alu kuasaNa ras tujun Dibata Bapa Kesah Si Badia erdahin man kalak si tek. Kesah Si Badia e pengganti kehadiren Jesus secara jasmani, ras Kesah Si Badia e tading ibas kegeluhen kalak si tek. Nina Rasul Paulus: "La kin ietehndu maka kulandu e me Rumah Pertoton Kesah Si Badia, si ringan i bas kam dingen si ibereken Dibata man bandu? Dirindu e labo kam empuna." (1 Korintus 6:19).

Aplikasi ras Renungen :

I bas erkiniteken, pemeteh kerna kata Dibata ras pengalamen kiniteken saja la bias, sabab pemeteh kerna kata Dibata ras pengalamen erkiniteken e la banci ngadi ibas sesekalak si tek saja, tapi arus jadi pemberitan. Erkiteken si e kalak si tek perlu penampat Kesah Si Badia, nampati ibas ersaksi ras ndahiken kesaksina.Kesah Si Badia e penampat. Ise kin kalak si nggeluh ibas doni enda la perlu penampat? Mungkin lit kalak genduari la ia perlu penampat sabab kerinana mehuli, tapi sada paksa pagi ia pasti perlu penampat, e maka si ingetlah tetap pengkawali Kesah Si Badia ibas kegeluhenta. Kesah Si Badia e mediate man banta kalak si tek, lalap Ia setia ngarak-ngarak kegeluhen kalak si tek, labo terjeng adi Ia i lebuh. Kesah si Badia e labo seri ras kesah doni si gelap. Kesah doni si gelap e reh nampati kalak si nembah ia ibas paksa ia erlebuh ras iberena persembahen saja. Kesah Si Badia erdahin nampati kalak si tek labo itentuken pengelebuh kalak si tek saja, tapi Kesah Si Badia setia rasa lalap ibas kerina keadan geluh manusia guna mere penampat sabab guna si e me Ia iutus Bapa man kalak si tek. Labo sieteh katawari musuh e ncilakai kita, tapi Kesah Si Badia tetap erjaga ngkawali kita, ngampangi kita ibas kuasa si jahat e nari, iajariNa kalak si tek berhikmat ngalakenca.Doni enda la nandai Jesus, tapi kalak si tek arah penampat Kesah Si Badia tek man Jesus, tek maka Jesus me dalan kebenaren ras kegeluhen maka ibas Jesus kap ngenca keselamaten. (bdg. Joh. 14:6).

pdt.ewgm.gbkp-sitelusada-bekasi

Read More

PJJ Tanggal 01-07 Mei 2016

PJJ Tanggal 01-07 Mei 2016

By Admin   11:04:00 PM

Bahan Perpulungen Jabu-Jabu, 01-07 Mei 2016

Bahan​:   Lukas 24:50-53
Thema​: ”Kenangkihen Jesus Ku Surga Jadi Keriahen Ukur”

Suplemen PJJ ::

Labo melukah ngaloken ras ngertiken kerna kematen Yesus i das kayu persilang, bali sulitna ras ngaloken bagepe ngertiken kekeken ras Yesus nangkih ku Surga. Labo lit kalak benar mate i datas kayu persilang, tapi kalak perdosa nge si i hukum mate i datas kayu persilang. Bagepe labo umum kalak si mate keke ibas kematen nari ras ibas jaman padan si mbaru labo lit iberitaken kalak si nangkih ku surga. Gelah lit gunana man kinitekenta, iperluken pemeteh si meganjangna ras kiniteken si mbagesna guna ngertiken ras ngaloken telu peristiwa si mbelin si ialami Yesus e. Janah ibas bahan perpulungen jabu-jabunta minggu enda secara khusus kita ngerana kerna kenangkihen Yesus ku Surga, ngkai maka jadi keriahen ukur man murid-murid ras kalak si tek?

Pembahasen teks

Arah peristiwa kenangkihen Yesus ku surga, Dibata ncidahken kemulian si iberekenNa man Yesus kenca penderitan si inanamiNa i datas kayu persilang, kematenNa ras ke kekenNa. Kerna kenangkihen Yesus ku Surga ibas Perb. rasul 1:9-11, Lukas nuriken Yesus iangkat ku Surga i lebe-lebe rasul e nari, jenari embun ngeligeni Ia. Embun e ncidahken kemulian Tuhan si reh ngalo-ngalo Yesus. Bandingken pe bagi peristiwa embun si nusur ku kemah perjumpan ibas jaman Musa, ibas embun e kemulian Dibata reh njumpai Musa (Kel. 33:7-11, 40:34), bagepe embun si reh ku Yesus si ngelinggemi Ia, janah ibas embun e nari ngerana Dibata nina "Enda me AnakKu si Kukelengi,..." (Mark. 9:7).

Kenca kekeken Yesus guna mpetetap ukur murid-muridNa gelah tetap erkiniteken man baNa bagepe guna mpetetap ukur mu rid-murid gelah nerusken pelayanen e, Yesus ncidahken diriNa sedekah empat puluh wari. Kenca kerina enggo bias iakap Yesus e maka seh me paksana Ia nadingken murid-muridNa, Ia nangkih ku Surga. Nina William Barclay "Yesus yang duniawi itu pada akhirnya menjadi Kristus Surgawi."

Kidekah Yesus secara jasmani lit i tengah-tengah murid-muridNa erbahanca kinipangenna ngalaken perbeben penginjilen ras ketetapen ukurna erkiniteken man Yesus ras Dibata Bapa tuhu-tuhu mehuli. Murid-murid nandai Yesus sebage Yesus si mulia, emaka kesirangen ras Yesus e la ngkurangi kemalemen atena sebab opedenga nangkih ku Surga Yesus nehken pedahna: "Arus itimaindu....nusur kuasa (Kesah si Badia) i datas nari man bandu." (Luk.24:49). Bagepe Yesus ngangkat tanNa masu-masu murid-murid e. Yesus lanai ras murid-muridNa, tapi ukur murid-murid enggo ipetetap Yesus alu Kata Dibata si enggo ipesehNa ras pengalamen erkiniteken si enggo ialamina kidekah ras Yesus.

Alu kenangkihen Yesus ku Surga jadi momo man murid-murid ras doni enda kerna Yesus ipermuliaken Dibata Bapa. E me si erbahanca murid-murid nembah ejimpuh man Yesus, meriah pe ukurna janah ilakokenna bagi si ikataken Yesus mulih ia ku Yerusalem, i je janahna nimai kerehen Kesah si Badia bagi si ipadanken Yesus, gedang-gedang wari ipujina Dibata Bapa. Kenangkihen Yesus ku Surga erbahanca meriah ukur murid-murid, peristiwa e tuhu-tuhu erlawanen kal ras sikapna asum Yesus i tangkap, iadili ras mate, pusuhna dem alu kebiaren, cebuni ia sabab la idahna kemulian Yesus tapi iakapna Yesus gagal. Alu pengidah jasmani kesirangen arusna erbahan aru ate, tapi erkite-kiteken murid-murid Yesus ngenehen kesirangen ibas kenangkihen Yesus ku Surga alu "mata kiniteken" (mata rohani) e maka erbahanca kesirangen e jadi keriahen, sabab ibas kenangkihen Yesus ku surga si i idahna e me kepastin kegeluhen kalak si erkiniteken man Tuhan, kenca kematen jadi me kekeken, ras kenca kekeken ibaba Yesus me kalak si tek ku surga rumah Bapa ibas paksaNa.

Aplikasi ras Renungen

Jelas kal perbedanna perbahanen kalak si dem keriahen ukur ras kalak si dem alu kebiaren. Kalak si dem alu kebiaren si arusna ilakokenna la idahikenna, sinik saja ia, entah cebuni, bagi si ilakoken Adam ras Hawa erkite-kiteken pelanggarenna, mbiar ia, emaka cebuni ia asum Tuhan reh man bana. Kalak si pusuhna dem alu kebiaren labo turah ukurna mperjuangken kemajun. Tapi kalak si pusuhna dem alu keriahen, terlebih lebih keriahen erkite kiteken ngidah kemulian Tuhan, erbahanca ia semangat ndahiken Kata Dibata, pang ngadapi kerina tantangen kiniteken ras nggit ia erkorban ibas pelayanen.

Kenangkihen Yesus ku Surga jadi pengarapen si nggeluh si mpetetap ukur murid-murid ras kalak si tek maka Surga ingan Dibata Bapa e tuhu-tuhu lit, janah Yesus lawes ku bas ingan e. Kerna Surga e Yeusu pernah ngerana man murid-murid niNa: "Ibas rumah BapangKu mbas ingan; janah lawes me Aku nikapken ingan man banndu. ...reh denga pagi Aku ngalo-ngalo kam, gelah ija Aku i je kam pe. (bdg. Joh. 14:1-4).

Jadi perenungen pe man banta bagi kai si ikataken Rasul Paulus: "Sabab aku enggo tek maka la lit kai pe si ngasup nirangken kita ras keleng ate Kristus: subuk kematen tah kegeluhen, subuk malekat-malekat, penguasa-penguasa ras kuasa-kuasa i langit, subuk kai si jadi genduari bagepe kai si jadi pagin. Subuk kai pe i babo doni tah iteruh doni, la lit kai pe i bas kerina si enggo ijadiken Dibata si ngasup nirangken kita ras keleng ate Dibata, e me keleng ate si cidahkenNa i bas Kristus Jesus Tuhanta." (Roma 8:38-39). Ras Yesus secara jasmani memang terjadi kesirangen tapi ras keleng ate Dibata ibas Yesus Kristus labo lit kesirangen. Keleng ate Yesus e me si erbahanca geluhta terkawali, e maka ermeriah ukurlah tetap ibas Tuhan, sidalankenlah kinitekenta alu tutus ate, seh paksana pagi Yesus reh mulihken ndahi kita gelah sialoken kemulian si rasa lalap.

Read More