Sunday, May 15, 2016

Admin

Renungan Harian, Senin 16 Mei 2016

By  
LUPA DIRI

Bacaan     : 2 Samuel 12:1-14
Setahun    : 1 Tawarikh 14-16
Nats    : Telah Kuberikan isi rumah tuanmu kepadamu, dan isteri-isteri tuanmu ke dalam pangkuanmu. Aku telah memberikan kepadamu kaum Israel dan Yehuda; dan seandainya itu belum cukup, tentu Kutambah lagi ini dan itu kepadamu. (2 Samuel 12:8)

Perjalanan hidup Daud--dari seorang bocah, mengalahkan Goliat, menjadi orang kepercayaan raja, hingga akhirnya menjadi Raja Israel--memperlihatkan rancangan dan penyertaan Tuhan dalam hidupnya. Daud juga hidup dalam ketaatan dan takut akan Tuhan. Namun, pada masa kejayaannya, Daud malah jatuh ke dalam dosa.
Dalam perikop hari ini, Tuhan mengutus Natan mendatangi Daud. Ia menceritakan perumpamaan tentang orang kaya yang memiliki banyak kambing domba dan lembu sapi dan orang miskin yang hanya memiliki seekor anak domba betina, yang dibeli dan dipeliharanya seperti anak perempuan. Ketika orang kaya itu kedatangan tamu, ia merasa sayang mengambil hewannya untuk dimasak dan dengan seenaknya mengambil domba betina kepunyaan si miskin. Mendengar kisah itu, Daud marah dan dengan tegas hendak menghukum si kaya. Natan menyatakan, orang kaya itu tidak lain Daud sendiri (ay. 7). Daud pun tertempelak. Ia memang telah mengambil isteri Uria dan tanpa merasa bersalah menyusun strategi perang yang akhirnya membuat Uria meninggal. Tampaknya Daud lupa diri. Karena merasa Tuhan di pihaknya, ia malah berbuat sesuka hatinya tanpa memikirkan akibatnya.
Kita bisa jadi juga pernah lupa diri. Lupa bahwa kita dulu orang berdosa dan kini telah ditebus oleh darah-Nya yang kudus. Lupa bahwa hidup kita seutuhnya adalah milik Allah. Lupa bahwa kita hidup untuk melakukan kehendak-Nya, yaitu mewartakan kabar baik. Oleh karena itu, janganlah sampai kita lupa akan jati diri kita. Jika kita lupa diri, dosa telah mengintip di depan mata. --Febrina Judith Hariandja/Renungan Harian

MENGINGAT IDENTITAS KITA DI HADAPAN TUHAN MENJAUHKAN KITA
DARI KESOMBONGAN YANG MENGAKIBATKAN LUPA DIRI.
Read More
Admin

Pekan Doa Sedoni wari VII, Tgl 21 MEI 2016

By  
Invocatio :
Erkiteken sie sitatang-tatangenlah janah si sampat-sampatenlah kam bagi si sangana ibahan kami genduari e (1 Tesalonika 5:11)

Renungen : Jop 42:9-11

Tema : Aron Dibata Si Ngkuhi Keriahen

I. Kata Perlebe
Sada keriahen kel man banta anak-anak Tuhan adi ngasup kita sada ras sidebanna sipengejapen ibas kegeluhenta. Selaku sada rarasen ibas Kula ni Kristus tentu kerina kita enda enggo jadi sada aron Dibata si ertanggung jawab guna ikut muat bagin ibas ndahiken pendahin Dibata. Ibas senang, ras-ras nggejabkensa, ibas susah ras-ras ngenanamisa. Tentu enda me sijadi arapen Tuhan ibas kita idiloNa jadi rarasenNa. Bagi lagu si mpersingeti kita "suindu jadi suingku, suingku jadi suindu". Persadan si sepenggejapen. Terlebih adi kegeluhenta enda setia ras benar iadepen Dibata ibas kerina situasi ras kondisinta. Tentu e jadi kesaksin si tuhu-tuhu ngkuhi keriahen selaku aron Dibata. Kita ibabai ngidah perdalanen kegeluhen kiniteken Jop si setia ras nggejapken pendahin Dibata ibas geluhna. Si ulihna ndatken keriahen situhu-tuhu ibas Dibata nari.

II. Mpebagesi Ogen.
Kitab Jop enda eme sada bagin kesaksin kerna kegeluhen Jop. Janah struktur kitab Jop enda ibagi kubas telu bagin: bagin sipemena eme jadi bagin pembuka, tentang kesejahteraan Jop ras kniseran Jop (1-2) bagin peduaken em jadi bagin isi kerna diskusi kerna kiniseran Jop ras pandangen teman-teman Jop kerna kiniseran Jop (3-42:6). Bagin peteluken eme bagin ibas ogenta sendah, eme bagin penutup si ncidahken uga pembelaan Jop pemulihen keadaan Jop (42:7-17). Tentu struktur enda perlu sieteh erkiteken akhir cerita geluh Jop (ogen) jadi sada rangkaian ibas bindu sipemena nari. Kitab Jop eme kitab sincidahken man pembacana maka kalak bujur (saleh) banci saja ndatken kiniseran ibas geluhna.

Jop eme sekalak si benar i adepen Tuhan. Ia termasuk salah sada kalak melala erta kinibayakenna ibas kutana (daerah Timur, daerah Edom). Tapi Kegeluhen Jop berubah erkiteken erbage-bage kiniseran si ngkernepken kerina ertana (erkiteken percubaan Iblis ; Jop1,2). Anak-anak Jop pe kerina mate. Teman-temanna, keluargana bahken ndeharana pe nalahken ia. Perubahen kegeluhen Jop jadi kalak si ikenai kiniseran jadi perbeben tuhu-tuhu baik e man teman-teman ras keluargana, bahken man Jop sendiri. Teman-temanna, keluarga ras Jop sendiri ndarami jawapen atas kai siterjadi e.
Bagin sijadi renungenta ibas wari enda eme bagin jawapen kerna persoalen kiniseran si inanami sekalak manusia si benar. Jawapen enda labo ijumpai ibas pemikiren teologis paksa si e(pemikiren teman-teman Jop), tapi erkiteken sada perjumpaan Jop ras Dibata ntah pe erkiteken penandai Jop kerna pendahin Dibata ibas kiniseran si inanamina. Janah erkiteken Tuhan ngidah kesetian Jop man Tuhan (termasuk kesadaren Jop maka pemetehna kerna Dibata terjeng kai si ibelasken kalak ngenca, ayat 5). Perdebaten siterjadi kerna kiniseran Job i selesaiken ibas bagin penutup kitab Jop (ayat 7-17).

ayat 9, kai sinilakoken Elipas, Bildat ras Sopar enda erkiteken penuruh Tuhan. Tuhan ncidahken man teman-teman Jop si telu kalak e (pendapat Elihu kemungkinen besar dianggap benar sehingga Elihu tidak disebutkan dalam ayat ini), maka pemahamenna selama enda kerna Jop salah. Terkhusus pe pemahamanen kerna rencana Tuhan. Sinipahami teman-teman Jop si ikateken Tuhan jadi kesalahen Elipas, Bildat ras Sopar:
1. Elipas, Bildat ras Sopar ngajarken kerna teologi kemakmuren ras teologi penderitaan. Isehkenna maka enda bali ras balas jasa, hukum tabur tuai (band. Ul.11: tentang kutuk dan berkat). Kalak si benar saja nge lalap ipasu-pasu Tuhan. Janah kalak sijahat (fasik) ndatken kemalangen. Banci si bandingken ras kai si ikataken Jesus ibas Johanes 9:3,-kalak pentang (ndat kemalangen) labo erkiteken dosana tapi gelah teridah kuasa Dibata ibas geluhna. Tapi ijenda Tuhan make kalak si benar guna ncidahken kuasa ras pendahinNa.

2. Elipas, Bildat ras Sopar nuruh Jop ngakui dosana, si labo pernah akap Jop ilakokenna (Jop 2:10). Erkiteken menurut teman-teman Jop, enda arus ilakoken Jop gelah banci Jop mulihken ipasu-pasu Tuhan. Alu pedah enda maka teman-temanna ncobai Jop guna mpergunaken gelar Dibata gelah ndatken keuntungen pribadi (hanya untuk mencari berkat bukan dekat dengan pemberi berkat). Maka adi iikutken Job kai sinikataken teman-temanna, Jop ncedai kiniteken Dibata man Jop selaku kalak sibenar. Tole pe enda menguatken tuduhen iblis maka Jop mbiar man Dibata hanya erkiteken pasu-pasu si idatna ibas Tuhan nari.

3. Elipas, Bildat ras Sopar ngerana alu nganggap benar kerina si iturikenna man Jop. Sada persada teman-temanna reh guna mereken pendapat sijadi perdebaten kerna penyebab kiniseran si nderpa kegeluhen Jop. Teman-teman Jop meyakini maka kiniseran sireh man Jop erkiteken dosa-dosa si ilakoken Jop (kemungkinen dosa si lateridah).

Erkiteken icidahken Tuhan kesalahenna e, maka Tuhan nuruh Elipas, Bildat ras Sopar gelah mereken persembahen tutungen guna mbersihken dirina arah pertoton Jop (ayat 8). Pertoton Jop idengehken Tuhan kerna Elipas, Bildat ras Sopar. Enda merupaken sada bukti litna perdamen antara Dibata, Jop ras teman-temanna. Ibas ayat 9 enda pe ncidahken maka secara kerohanian Jop enggo ipulihken. Erkiteken Jop nge si ipake Tuhan guna notoken teman-temanna.
Ayat 10: pemulihen kegeluhen Jop.
Pemulihen kegeluhen Jop ncidahken rencana Tuhan ibas kegeluhen kalak si setia ras tek nangdangi Dibata. Dibata terkadang mereken kiniseran terjadi ibas kegeluhen kalak si benar. Tapi labo ertina Tuhan mereken hukumen, tapi guna ncidahken kuasa Dibata nangdangi kerina tinepaNa. Ibas keadaan si ugapa pe Tuhan banci erdahin. Ibas keadaan siugapa pe beratna Tuhan tetap banci nge mpehulisa. Kai si inanami Jop, kiniseran kerna kebenen erta-ertana, anak-anakna, keluarga ras teman-temanna nadingken ras nalahken ia, bahken ia sendiri kena pinakit si mekelek. Enda kerina ipulihken Dibata erkiteken Jop tetap setia man Dibata janah lit sada pengakun (pertobaten) ibas Jop kerna pemahamen ras penandaina kerna Dibata (Jop 42:1-6).

Ayat 10 enda pe ncatat maka kegeluhen Jop mulihken man bana, erta kinibayekenna mulih bahken duakali lipat asa sope ia ngenanami kiniseran. La ngenca erta kinibayeken, anak Jop pe lit pitu kalak dilaki janah telu kalak diberu. Janah sebelang-belang negeri e, anak-anak Jop e si jilena ( ayat 12-15). Perdamen antara Jop ras Dibata, janah pemulihen kegeluhen Jop ncidahken maka kiniseran ntah pinakit simekelek si ialami kalak benar, maka ibas paksana Tuhan pasti erdahin guna mereken kemalemen/ pemulihen si tuhu-tuhu. Tentu arah ayat enda pe nuriken maka kalak si tetap setia ras nggit ngangkai rencana Tuhan ibas kiniseran (pencoban) geluhna akhirna pasti banci ngenanami keriahen ukur si tetap ibas Tuhan nari.

Ayat 11, bagin si ncidahken maka kerina si mbarenda nadingken ras menghakimi Jop reh mulihken. Tentu enda sada bentuk pendamaian Jop ras keluargana rikutken ras teman-temanna. Teridah perubahen cara pandang/rukur keluarga ras teman-teman Job kerna kiniseran Jop. Keluarga ras teman-teman Jop ncidahken kepedulinna man Jop. Ibas situasi kegeluhen Jop e reh ia ndahi Jop guna mereken kata pergegeh. La terjeng sie ngenca kerina ia nampati Jop alu mereken duit ras cincin emas. Ras man-man ia kerina i rumah Jop. Teridah enggo lit mulihi kiniersadaan ibas jabu Jop. Kiniersadan enda me ncidahken kegeluhen Jop ras keluarga bagepe teman-temanna si sampat-sampaten (aminna pe keluarga ras teman-teman Jop pernah nadingken ras nalahken Jop). Arah kerehen keluarga ras teman-teman Jop enda tentu jadi bukti maka lit sada keriahen si mbelin ibas kegeluhen Jop. Ia pe mulihi ndatken erta kinibayaken ras kinihaganna. Ikuhi alu kehadiren keluarga ras teman-temanna nampati Jop.

III. Pengkenaina.
Titik balik kegeluhen Jop eme kenca ia ngakuken maka Dibata ngasupp ngelakoken kai pe sue ras sura-suraNa. Jop ngakuken maka penandaiina Dibata hanay sebatas kai sinibegina ibas kalak nari. Tapi iakui Jop maka tuhu-tuhu enggo itandaina Tuhan arah kiniseran si enggo inanamina. Enda me si erbahanca cara penandai Jop berubaha nangdangi Tuhan. Jop erdame ras Dibata kegeluhenna pe ipulihken Tuhan. Jop lanai mpersoalken kiniseran sir eh kubas geluhan tapi enggo banci ia ngidah pendahin Dibata ibas perdalanen kegeluhenna secara mata kinitekenna. Kenca si e Tuhan mereken kesempaten man Jop guna erdame ras teman-temanna si enggo nalahken Jop. Jop notoken teman-temanna bagi si isuruh Tuhan.

Kai sijadi pertoton Jop guna temanna si telu kalak e ibegiken Dibata. Teridah maka Jop secara kiniteken (kerohanian) pe ipulihken Dibata. Ia percayaken Tuhan guna pendoa man teman-temanna. Kenca sie kegeluhen Jop mulihken berubah, bahken kinibayakenna ibereken Dibata dua kalilipat asa sope ia ndatken kiniseran. Kai si enggo mbarenda bene ibas Jop nari mulihken man ia. Keluargana, teman-temanna si mbarenda enggo nadingken ia mulihken reh. Janah la terjeng reh ngenca tapi ikut muat bagin guna nampati Jop. Mereken pergegeh janah mereken duit ras cincin emas.

Perenungen:
1. Kerina kalak si tetap setia man Tuhan ibas kiniseran/pinakit maka ia nge singenanami kemalemen ate si tuhu-tuhu sirehna ibas Dibata nari (bnd. Jak.1:12). Nggejapken rencana Tuhan ibalik kiniseran si terjadi ibas geluhta tentu jadi sada pelajaren si meherga. Paguh erkiniteken man Tuhan ibas kerina situasi (Plp.4:13). La pang nadingken Tuhan. Erkiteken Tuhan nge si erkuasa nangdangi geluhta. (1 Pet.5:10-11). Janah arus si inget maka Dibata tetap erdahin guna kiniulin kalak si erkeleng ate man baNa (Rom.8:28).
2. Selaku kalak si erkiniteken kita la pedas muat keputusen ntah mereken pendapat adi lit kita, temanta ntah keluarganta ndatken perbeben/kiniseran/pinakit e erkiteken dosana. (bnd. Jak.4:11-12). Tapi ibereken pemahamen arah perdalanen geluh Jop enda, maka Tuhan ncidahken kuasaNa ibas kerina situasi ras keadaan sue ras sura-suraNa.
3. Sue ras temata wari enda " Aron Dibata Singkuhi Keriahen"
Aron eme sada bentuk kerjasama si jadi konsep kegeluhen kalak Karo ibas sisampat-sampaten. Aron eme sada pandangen kalak karo labo saja ibas ndahiken pendahin i juma, tapi pe sada kegiaten/ dahin sinilakoken radu ras (secara bersama-sama) /gotong royong. Arah pengertin enda banci siidah dua hal, sipemena: Jop eme aron Dibata singkuhi keriahen Dibata. Erkiteken selaku kalak sibenar Jop tetap nge setia kempak Tuhan. Jop bagin anak Dibata/ sijadi saksi Dibata, si nggeluh benar labo erkiteken hanya ndatken pasu-pasu Dibata guna kesenangen geluhna. Tapi erkiteken ia erkemalangen man Dibata. Pusat kinitekenna labo pasu-pasu Tuhan tapi kempak Tuhan si mere pasu-pasu. Sipeduaken, jadi keriahen man Job erkiteken perbahanen Dibata ibas mereken ulihi erta ras memulihken keadaan geluhna. Keriahen sinibereken Dibata e kuh ibahan Dibata alu kehadiren keluarga ras teman-teman Jop. Kerina jadi sada aron guna ngkuhi keriahen Jop. Erkiteken kerina ia ersada guna mengubah cara pandangna kerna geluh Jop. Kerina reh ndahi Jop, guna ikut nggejapken kai si enggo terjadi ibas geluh Jop. La terjeng reh ras man-man, tapi kerina ia ibas keriahen ukur guna nampati Jop. Tentu enda jadi pengajuk man kerina ngawan perpulungen gelah selaku aron Dibata, kita kerina jadi min saksi ibas kegeluhenta guna ngkuhi keriahen temanta. Labo saja ibas ia keriahen ukur tapi pe ibas paksa kesusahen. Kita arus tetap jadi keluarga, bagepe jadi teman ibs kerina situasi. Kita enggo jadi aron Dibata guna ras-ras ndahiken dahin Dibata. Terlebih guna ncidahken kekelengen sada ras sidebanna (Gal. 6:2). Bagi ibas invocation-ta 1 Tesalonika 5:11, "sitatang-tatangenlah janah sisampat-sampatenlah". Kita iarapken jadi aron Dibata si banci mereken motivasi ras semangat baik arah pengerana si benar (tidak menghakimi) ras bagepe nampati arah kinilitenna (erta/talenta). Jadi keriahen min man banta adi banci kita nampati teman/keluarganta terlebih ibas keadaan keguluten geluhna. 
Alu bage tentu Dibatanta dem keriahenNa natap kita selaku aronNa. Ibas kita nggeluh sikeleng-kelengen, setia ras benar bagi singena ateNa. Amin.

Pdt. Nopritawati Br Kembaren, S. Th
GBKP Perpulungen Banjarmasi
Read More
Admin

Pekan Doa Sedoni wari VI, Tgl 20 MEI 2016

By  
Invocatio: 
Aloi aku, Tuhan, Aloilah, gelah ieteh bangsa enda maka Kam Tuhan Dibata kap, maka Kam me si mabai bangsa enda mulihken man banNdu (1 Raja-raja 18:37)

Renungen : Jakup 5:13-20

Tema : Pertoton Kalak Bujur Ergegeh Kel


I. KATA PENARUH
Surat Yakup isina eme ajar si erguna siibereken man “kerina anak-anak-anak Dibata si merap marpar kesilang ibabo doni enda. Jakup mpergunaken perumpamaan-perumpamaan si jelas guna nerangken kugakin arusna perlagulangkah kalak Kristen. Arah dampar agama Kristen icakapkenna pe piga-piga tema eme: kerna kinibayaken, kinimusilen, percuban, lagu langkah si mehuli, cian ate, kiniteken ras perbahanen, cakap manusia, kepentaren, perubaten, megombang ras ukur meteruk, kerna nalahken kalak, ngerana meganjang ras kerna kinigenggengen ras ertoto.

Tujun surat enda itulis eme guna mbangun semangat kalak Yahudi si erkiniteken si sangana dem alu erbage-bage perbeben guna nguji kinitekenna. Bagepe surat enda itulis guna mpekena mulihi pengangkaan si salah kerna kiniteken si nelamatken. Bage pe surat enda itulis guna ngajarken ras mbina singogesa kerna ulih kiniteken ras perbahanen si mehuli eme nggeluh benar iadepadepen Dibata.

Bahan Pekan Doa ta sendah eme kerna ertoto. Secara umum sinen tema ta enda “terlalu tinggi”, engkai maka bage? Sebab uga ninta banci Pertoton kalak bujur ergegeh kel adi suruh saja kin pe ertoto megati denga nge si dalih-dalihen (secara umum). Berarti adi ertiken arah temata enda, kesanna maka lanai situhuna lit kalak Kristen la nggit ertoto adi isuruh kenca ertoto, tading uga kalak Kristen berusaha nggeluh gelah benar iadep-adepen Dibata.

Padahal secara kiniteken toto (doa) eme kesah nandangi kalak sierkiniteken. Berarti adi la ertoto seri ras la erkesah. Berarti kalak si la erkesah pasti mate, berarti kalak si la ertoto seri ras kalak si mate secara kiniteken. Tapi engkai maka melala denga kalak la pang entah pe la nggit adi suruh kenca ertoto? Erkiteken lenga jelas pengangkanna kerna makna ertoto.

Janah ibas dampar sideban manusia ertoto man Tuhan, tapi ertoto ka ia man dibata-dibata sideban. Janah la jarang manusia termasuk kalak si enggo nandai Dibata pe zaman genduari e ilakokenna denga sinkritisme (suatu proses perpaduan dari beberapa paham-paham atau aliran-aliran agama atau kepercayaan). Memang rajin ia ertoto man Dibata, rajin ia ngoge pustaka si Badia tapi pe mindo ka nge ia ku guru-guru si baso. Bahken seakan-akan melala kalak ertoto secara kalak si erkiniteken ibanna jurus terakhir. Adi lanai tertambari kujapape emaka ilebuhna perpulungen ras kemahen Tuhan.

Arah Kebaktin Pekan Doa sedoni enda erlajar kita sada minggu kaikin ertina ertoto, uga arusna kalak ertoto, man ise kita perlu reh gelah ajarina kita ertoto ras pertoton si ugakin maka ibegiken Dibata.

II. PEBAGESI PENGANGKAAN KERNA TEKS
Perbeben si mberat si nderpa kita erbahansa kita perlu ertoto. Emaka menurut Yakup adi sekalak sakit mekelek ula ia lawes ndahi gegeh-gegeh doni enda, entah pe ula min dahina kalak si ergegeh secara doni enda. Tapi dahina min sekalak Pertua si enggo itangkuhken Dibata ras enggo ipilih Dibata jadi serayanNa. Ibas kerina keadaan, kalak sierkiniteken harus encidahken ketergantungenna man Dibata (13). Adi daging kula kote entah pe ngenanami pinakit si mekelek si perlu kel pergegeh ibas sekalak kemahen Tuhan nari, kalak sisakit e banci dilona kemahen Tuhan.

Lit 2 tindaken siiperluken gelah pertotonna banci ijabab Dibata alu mpepalem pinakit si sakit e. Sisakit e arus ngakui dosana iadep-adepen Tuhan, subuk dosana man Dibata bagepe sapih-sapih manusia. Sipeduaken kemahen Tuhan e iajari Yakup gelah iminakina sisakit e. Engkai maka isuruh Yakup Serayan Tuhan e minakina kalak si sakit e? Erkiteken minak melambangken kuasa Kesah Si Badia guna mpepalem, minak siipake guna nampati kiniteken (bnd. Mrk. 6:13).

Tapi arah perikopta enda labo berarti Yakup ngataken maka minak e erbahansa malem pinakit, tapi pemaken minak e eme sebage sarana guna nampati gelah tek. Tapi si mpepalem pinakit e labo minak e tapi Tuhan nge simpepalem si sakit e sebage jababen arah toto si dem alu kiniteken. Emaka nina Yakup pertoton si isehken man Tuhan alu kiniteken eme pertoton si isehken man Tuhan alu keyakinen kerna kuasa Dibata si ngasup mpepalem pinakit. Mungkin saja kalak si sakit e labo asal totoken malem naring pinakitna, tapi amin bage gia gereja arus terus menerus ndarami kuasa Dibata ibas lias atena nandangi kalak si sakit e ras guna kemulian Kristus.

Yakup ngidah maka pinakit lit mungkin erkiteken dosa (ay. 16). Emaka nina Yakup adi lit kalak sipinakiten harus iperiksana dirina iadep-adepen Tuhan arah pertoton gelah ietehna apakah pinakit si lit bas daging kulana e erkiteken dosa-dosa pribadina aminna gia labo kerina pinakit jadi erkiteken dosa. Ngakuken dosa ras saling mendoakan mereken sada alasen si penting engkai maka rusur kel bas kalak Kristen la terjadi kesembuhen. Dosa arus iakuken sebab dosa ngolangi pertoton kalak si tek man Tuhan janah dosa pe ngolangi kuasa penyembuhen bas Tuhan nari.

Pertoton kalak sibenar/ bujur seh kel belinna kuasana. Sebab pertoton kalak sibenar i adep-adepen Dibata erbahansa: reh deherna ia ras Dibata (bnd. Heber 7:25), mbuka dalan kegeluhen si dem alu Kesah (Luk. 11:13; Perb. 1:14), mpeturah kuasa kuasa guna ngelai (Perb. 1:8), Pengabdin kalak Kristen (Ef. 1:19), Mbangun secara rohani (Yud. 20), mereken wawasen kerna pemeliharaan Kristus (Ef. 1:16-19), nampati kalak sitek naluken kuasa Iblis (Dan. 10:12-13), nuriken kerna sura-sura Tuhan man kalak si erkiniteken (Mazm. 32:6-8), mereken kemungkinen kalak sitek e ngaloken karunia rohani (1 Kor. 14:1), mabai kalak sitek e kubas persadan ras Tuhan (Mat. 6:9), Maba perkuah ate, kemurahan ras kesejahteraan (Flp. 4:6-7), Maba kalak si bene mulihken kubas Kristus, mereken hikmat, penyataan ras penandai kerna Kristus (Ef. 1:16-17), mpepalem pinakit (ay. 15), mbebasken kalak si tek ibas kesusahen nari (Mazm. 34:5-8), mpermuliaken Tuhan Dibata alu pujin ras pengataken bujur (Mzm. 100:4), Njadiken kerehen Kristus tangkas man kalak si tek (Ketangkasen 3:20), mastiken kalak si tek kerna keselamaten ras pertoton Kristus man bana (Ibr. 7:25).

Janah uga kin ikataken pertoton kalak benar (si bujur)? Isekin siikatakane kalak si bujur? Alkitab ngajarken maka kalak si bujur eme kalak siibenarken erkiteken tek ia man Tuhan Yesus Kristus (Rm. 3:26, 5:1). Kalak si benar labo berarti la ia erdosa, tapi kalak si bujur/ benar eme kalak si aminna gia ia erdosa tapi kata wari paksa pe sadar ia ras nggit ngaku maka ia erdosa iadep-adepen Dibata. Emaka katawari paksa pe iadaramina Tuhan. Alu kata sideban kalak sibenar iadep-adepen Dibata eme kalak si ngakui dirina uga litna. Umpamana Jop, Jop ikataken kalak benar/ saleh labo erkiteken ia badia, tapi ia benar erkiteken ia sadar maka ia manusia kap ngenca seh maka kata wari paksa pe lalap deher ia ras Tuhan. Kalak bujur/ benar eme kalak singaloken Yesus Kristus sebage Tuhan ras juruselamatna.

Ibas sienda Yakup ngutip contoh pertoton kalak si benar eme pertoton Elia. Elia eme sekalak si erkiniteken maka toto siipesehna man Tuhan mbelin hasilna seh Dibata turun tan arah alam. Elia tek maka pertoton kalak si benar iadep-adepen Dibata memang ibegiken Dibata (ay. 13-16, Mazm. 34:7; Yes. 38:1-5). Janah arah sienda si idah maka pertoton ras kinitekenta man Dibata erbahansa melala hal si mehuli si la banci jadi adi la kin erkiteken totonta man Dibata (Kel. 32:9-14).

Emaka arah bahan Pekan Doa ta enda nuriken maka kalak sierkiniteken harus berusaha ngelakoken hal-hal si mehuli guna mabai kalak si papak mulihken ku Tuhan. Kalak sierkiniteken arus erusaha mabai kalak si lanai nggeluh ibas kebenaren gelah min ia mulih kubas kegeluhen sibenar iadep-adepen Dibata. Sebab keselamaten sekalak jelma si enggo mulai mundur seharusna kata wari pe jadi perioritas masyarakat Kristen sebab adi sekalak murtat mulihken man Kristus maka simabasa mulih e nelamatken kalak si erdosa e arah kematen nari eme kematen rohani ras pemisahen si rasa lalap ibas Dibata nari (Rm. 6:23).

III. PENGKENAINA
Arah bahan Pekan Doa ta enda mereken pengertin si mbaru man banta aminna gia megati sibegi. Engkai maka hal simbaru aminna gia rusur sibegi sebab temata eme Pertoton Kalak Bujur Ergegeh Kel. Sebab sijadi ibas praktekna labo bagi temata enda, tapi perpulungen genduari lanai bo berusaha gelah ia nggeluh ibas kebenaren Dibata tapi ia berusaha ndarami kalak si benar guna notoken ia gelah seh sura-surana. Alu kata sideban manusia enggo tergantung man manusia lanai man Dibata. Janah la ka sitek jelma lanai bo merasakan penyertaan Tuhan tapi enggo sinotoken ia e iakapna Dibatana.

Tangkas siidah arah bahan Pekan Doa ta maka labo Pertua sinotoken kita e sipepalem pinakit, labo minak si iminakken kubas dging kula sisakit e simpepalem pinakit tapi kiniteken si turah arah sisakit e. Emaka kehadiren kemahen Tuhan nandangi sisakit e eme erkiteken daging kula kote entah ngenanami pinakit si mekelek si perlu kel pergegeh ibas sekalak kemahen Tuhan nari emaka kemahen Tuhan e hadir guna mpegegehi ia gelah tetap tek nandangi kuasa Dibata singasup mpepelem ia janah tetap nggeluh ibas kebenaren Dibata.

Adi sinen kubas pelayanen Yesus, la kel pernah ikatakenna maka Ia erbahansa malem pinakit sisakit e, tapi Yesus ngataken “kinitekenndu erbahansa malem pinakitndu (bnd. Matius 9:27-29, Mat. 8: 5-13, rsd). Arah bahan PJJta enda kita iajuk gelah kita tetap nggeluh bujur iadep-adepen Dibata aminna gia erbage-bage perbeben si nderpa kita sebab lit dalanta mindo gegeh man Dibata guna nampati kita ngalaken perbebenta eme alu ertoto man Tuhan.

Pdt. Jaya Abdi Tarigan
GBKP Rg. Bandung Pusat
Read More
Admin

Pekan Doa Sedoni wari V, Tgl 19 MEI 2016

By  
Invocatio: 
“E maka ola pada sitik pe kam mbiar. Aku pekena-kena kam ras anak-anakndu.” Dage alu kata si melias e, ipetetap Jusup mulihi ukur senina-seninana seh maka malem atena kerina” (Kejadin 50:21)

Renungen : Imamat 25:35-38

Tema : “ARON DIBATA SI ERTOTO, SI MPEHAGA TEMAN”

Senina ras Turang ibas Tuhan Yesus,
Kegeluhen kalak Karo ibas paksa si nai terberita kal kerna perbahanen si sampat-sampaten. Enda banci teridah ibas mbangun rumah adat Karo. Mbarenda, guna mbangun Rumah Adat e, kerina anak kuta ersada arih guna majekkenca, kerina kebeluhen ras gegeh si lit ibassa ipakeken guna banci pajek runah adat e. Bage pe dikune lit kalak tandang reh ku kuta e, maka minter nge lit si reh lako ngoratisa kema kai kin keperlunna. La terjeng e, adi lit kalak erjabu ku sada kuta, janah atena ringan i kuta e, maka semal nge kalimbubu mereken perjumanna seh maka lit dahin si man dahinken guna ndatken keperlun geluhna.

Emaka, ibas kegeluhen Kalak Karo lit kuan-kuan si ngataken “Si ageng-agengen radu mbiring, Sikuning-kuningen radu megersing” Ertina, adi ibas kegeluhennta si nilakoken kita rusuren ndarami si la payo ibas temanta, maka kegeluhenta labo reh ulina, tapi reh gulutna. Tapi, adi ibas kegeluhenta sinilakoken kita eme uga maka kegeluhen temanta reh sikapna, tentu ulihna pe pasti reh jilena.

Senina ras Turang,
Berngi/Wari enda eme paksa si pelimaken kita ndalani Pekan Doanta, janah themanta ibas paksa enda eme Aron Dibata si Ertoto, Si Mpehaga Teman. Gendekna, adi nulih kita kempak kegeluhen nini-nininta ndube (si mungkin langa denga erkiniteken bagi kinitekenta genduari; baca : Kristen), uga nge kecibalta bas paksa enda? Reh ulina nge ntah reh murdena? Ngkai maka ikataken kami bagenda? Sabab, nina jaman genduari enda menam-menam kerina jelma bagi si ipaksa guna “erlumba” ngayaki keperlun geluhna. Janah menam-menam ka nge bagi si mekatep kita megisa maka jaman enda memang reh majuna, tapi kegeluhen reh serana. Lit pe terkuan ibas bahasa Indonesia, nina : “Jangankan cari uang halal, cari uang haram pun susah”. Sedangken selaku kalak si erkiniteken, tetap ipindo man banta maka kita la banci nggeluh ngukurken dirinta saja, tapi perlu tetap kita ikut ngukuri keperlun temanta.

Pengogenta pe ncidahken uga aturen nggeluh si ipeseh Tuhan nandangi kalak Israel. Ibas aturen e, si la banci lang arus ilakoken kalak Israel eme nampati temanna si lit ibas kesusahen. Janah ibas nampati, la banci ije kalak Israel ngukuri kai nge untungna man bana ibas ia nampati temanna. Nampati arus ilakoken erpalasken mbiar man Tuhan. Ertina, kalak Israel si man bana lit gegeh lako nampati temanna, tentu man bana enggo ibereken Tuhan pemere si lebih, si man bana enggo me tercukupi keperlunna, janah lit denga iba na. Tuhan enggo mereken pemere si mbelin man kalak Israel eme ibas Tuhan engo mbaba ndarat ibas taneh perkawanen janah itaruhkenNa ku taneh si mehumur si dem alu pasu-pasu Tuhan. Alu bage maka, si ibahanna ntah ipakena guna nehken penampat e eme kai si enggo ibereken Tuhan man bangsa ntah kalak Israel.

Pengertin si deban si banci si idah ibas pengogenta enda eme : Manusia e eme mahluk si meherga, aminna gia adi nulih kita kempak kegeluhenna maka sangana mesera kegeluhenna. Banci saja ibas sada paksa erkiteken ntah kai si jadi ibas kegeluhenna, maka kegeluhenna jadi mesera. Ntah pe bage kin ibas kegeluhenna, adi tatapen doni musil kin ia. Tapi adi perdiateken arah ogenta enda, maka man kalak ntah kita si ibereken “kelebihen” ibas Tuhan nari, maka jadi “kewajiben” man banta lako nehken penampat. Ras, penampat e tuhu-tuhu kin penampat, labo tempa-tempa nampati tapi situhuna labo nampati tapi erbahanca temanta e reh susahna. Enda me si ipersingeti maka ibas nampati, palasna eme mbiar man Tuhan ras nggejabken maka e perentahNa kin.

Jadi…. Senina ras Turang Kekelengen Tuhan
Ertoto eme biak nggeluh kalak si erkiniteken ras ernalem man Tuhan. Adi ninta maka kita kalak si erkiniteken ras ernalem man Tuhan, maka tentu lit ibas pertotonnta ija kita mindo ku Tuhan seh gelah ibreNa kita pasu-pasuNa. Lebih asa si e tentu ibas pertotonta pe maka si pindo ka pe man Tuhan maka iajariNa ka pe kita guna ngasup ngaturken pasu-pasuNa e. la terjeng man banta saja, tapi pea rah pasu-pasuna e, si pindo pe maka banci arah pasu-pasuNa e, kita makekenca ka guna kalak si deban.

Kegeluhenta arah pasu-pasu Tuhan labo erbahanca kalak si deban reh dauhna ras kita. Engkai? Sabab reh buena pasu-pasu Tuhan erbahanca kita “lanai terdeheri”. Tapi, arah pasu-pasu Tuhan, erbahanca kita reh riahna nggeluh ras kalak si deban entah kin e keluarganta, kade-kadenta, teman-temanta, ngawan ni perpulungenta, rasp e banci saja kalak si mbaru denga itandaina ntah si tandai ia.. Engkai? Sabab bali bagi Yusuf, ia ipasu-pasu Tuhan lako banci mpetetap ukur seninana, aminna gia lit si la payo si ilakoken senina-seninana man bana. Labo e si perdiatekenna, tapi si ipernehenna eme uga Tuhan tetap nemani ia ras mereken pasu-pasu si reh simparna.

Bage me pe kita, labo kai si ibahan kalak man banta si erbahanca geluhta jadi mehaga, tapi kai si bahan Tuhanlah si erbahanca geluhta reh mehergana ras reh mehagana. Emaka ula mbiar ibas nehken penampat man si biakna kin man sampaten. Tuhan si masu-masu kita kerina. Amin.

Pdt. Benhard Roy Calvyn Munthe
GBKP Rg. Cisalak
Read More
Admin

Pekan Doa Sedoni wari IV, Tgl 18 MEI 2016

By  
Invocatio : 
“Kedungenna o senina-senina, ertotolah kerna kami, gelah Kata Tuhan pedas min reh mbarna dingen ialoken kalak si nterem bagi enggo jadi i tengah tengahndu” (2 Tesalonika 3:1)

Renungen : Pilipi 1:3-11

Tema : “ARON DIBATA SI NGELAI”

Pendahuluan
Kata aron nggo rusur sibegi. Aron eme sada konsep tentang kerjasama ras tolong menolong ibas masyarakat suku Karo baik ibas menghadapi ancamen bagepe ibas dahiken dahin i juma ntah dahin sideban. Istilah aron eme sisaro-saron (saling membantu) si i wujudken ibas kelompok jelma nguda ntah nggo dewasa. Mulai 6 seh 24 kasada kelompok.

Ibas dahin aron e labo i galari pake sen tapi i galari pake tenaga, ija aron e terbentuk arah kesepakaten ras anggota si nggo i bentuk. Aron biasana i mulai ibas jam 8.00 seh jam 17.00 WIB. Ibas dahiken dahin e lit je keteraturen antar anggota aron gelah seh tujun ras tetap terjaga hubungen si mehuli. Pola kerjana pe i lakoken secara bergiliran, sue ras kebutuhan si empuna juma anggota aron. Ibas bahannta sendah i bahas maka kita me aron Dibata si ngelai ( melayani)

Isi
Ibas surat Pilipi 1 enda maka Paulus nuriken man anak-anak Dibata ras pemimpin-pemimpin ras si nampati Paulus ibas nehken berita si meriah. Ibas paksa surat enda i tulis, Paulus sangana i Penjara. I tulisken Paulus uga ia ngataken bujur man Dibata nginget perbahanan mehuli perpulungen Pilipi. Paulus nggo encidahken kekelengen arah pelayanen i tengah-tengah perpulungen Pilipi, keleng atena perpulungen e alu palas kekelengenYesus Kristus.

Piga-piga hal i kataken Paulus tentang Perpulungen Pilipi eme aron Dibata:
1. Si nggit nampati ibas dahiken dahin Berita si Meriah.
2. Setia perpulungen e mulai pertama reh berita Si Meriah seh pe Paulus i Penjara
3. Kerina Perpulungen enggo nggejapken ngenanami Lias ate Tuhan Yesus bagi si ni alami Paulus

Kekelengen Paulus nandangi perpulungen Pilipi si jadi aronna maka teridah arah tedeh ate ras ibas petotonna man Tuhan kerna perpulungen eme:
a. Gelah tetap encidahken kekelengen si rehna ibas Tuhan Yesus nari.
b. Dat pemeteh si tuhu-tuhu ras pengangkaan si serta, gelah i eteh perpulungen e milih apai si mehuli ras la ngelakoken si la mehuli.
c. Tentu adi i lakoken a ras b maka kune reh Yesus e i dat Na perpulungen e bersih dingen la erpandangen.

Aplikasi
Ibas kegeluhen enda, kita eme aron Dibata i doni enda si ngelai labo i elai. Kita arus encidahken :
1. Sifat ntah karakter Yesus perlu i teladani bagi Paulus ras perpulungen Pilipi si nggit nampati ibas nehken berita Si Meriah e. La terjeng ngerana saja. Tapi lit aksi nyata teridah kekelengen Tuhan e tergejap ibas kegeluhenta. Tentu adi nggo si gejap ras si sedari keleng ate Tuhan tentu nggit kita engkelengi kalak sideban alu nampati asa gegehta arah pusuh si dem pengataken bujur adi lit temanta kesusahen. La alu jungut-jungut.

2. Setia ibas ndahiken dahin Dibata amin melala tantangen sinihadapi kita ibas jaman gundari. Metenget kita, ula mbiar tetap Setia ras tek man Yesus. Ia setia nemani ras mereken pasu-pasuNa man banta.

3. Ibas kita nehken pelayanen ngelai alu ngelakoken si terbaik bagi man Yesus Kristus.
Nggo sikapken Tuhan upahna si labo seri ras pengertin upah ibas doni nari. Dibata ngenehen kai si lakoken. Upah ibas Dibata labo pake sen tapi alu darehNa enggo nggit mate guna nebusi kita gelah kita selamat dat kegeluhen rasa lalap. 

4. Mari kita notoken sada ras sideban, guna menguatkan. Sesama aron Dibata kerina gelah saling notoken pergumulan ras perbeben si nihadapina. Lit je keteraturan ras meriah ukurta nginget perbahanen teman-temanta guna jadi aron Dibata.
Pdt. Rosliana Br Sinulingga
Rg. Semarang
Read More
Admin

Pekan Doa Sedoni wari III, Tgl 17 MEI 2016

By  
Invocatio :
Nandangi Undang - undang e aku situhuna enggo mate,janah lanai lit sitik pe kuasa Undang - Undang e nandangi aku seh maka banci aku nggeluh guna Dibata. Aku enggo I pakuken ras Kristus I Kayu persilang. Lanai aku si nggeluh,tapi Kristus kap singgeluh ibas aku.Kegeluhen ku Si genduari ibas doni enda ku geluhken erkiteken kiniteken man anak Dibata,si engkelengi aku dingen ngendesken dirina man gunaku(Galatia 2:19-20).

Renungen : Juna 2:1-3:3

Thema : “Aron Dibata si ertoto,situtus ndalanken komitmen”


Senina ras turang ibas keleng ate Yesus Kristus,lit kata bijak ngataken,”totokenlah kai si idahiken,dahiken lah kai si itotoken”.Ertina ibas pertoton kita ngendesken kerina kegeluhenta radu ras pendahinta, bage pe arus mejingkat ndahiken kai si enggo sitotoken man Dibata.Kegeluhen anak- anak Dibata eme kegeluhen ibas ertoto,sebab arah pertotonta man Dibata kita ndatken gegeh,serpang pulah ras pasu pasu.

Ibas pekan doa sedoni sipe 3 ken enda, kita I persingeti mulihi kerna tugas ras panggilan man kerina perpulungen ibas ndahiken dahin pelayanen gerejanta. Erpalasken Garis – garis Besar Pelayanan Gerejanta si jadi perayakentaras, ibas tahun 2016 - 2020 eme :

1. Visi : “GBKP menjadi kawan sekerja Allah untuk menyatakan rahmat
Allah kepada dunia”. “GBKP aron Dibata guna jadi pasu – pasu man isi doni”.(1 Kor.3:9, 1Pet.2:9-10)

2. Misi :
• Menumbuh kembangkan spiritualitas jemaat berbasis alkitab.
• Menegakkan keadilan, perdamaian dan keutuhan ciptaan Allah.
• Memperkuat semangat gotong royong antar sesama jemaat dan masyarakat.
• Menggali dan Menumbuh kembangkan potensi jemaat untuk bersekutu dan bersinergi.

3. Tujuan : Meningkatkan panggilan dan komitmen warga dalam melakukan pelayanan (Berteologia, Pendidikan dan kesehatan, Berpolitik, dan kegiatan ekonomi, pelestarian lingkungan Budaya dan pemanfaatan teknologi informasi).

4. Sasaran GBKP tahun 2016 : Meningkatkan komitmen warga GBKP yang missioner untuk berpartisipasi dalam pelayanan

Guna nuju ku bas visi, misi , tujuan ras sasaran GBKP enda tentu labo serta gegeh ras pemeteh silit ibas kerina serayan ras jemaat tanpa campur tangan Dibata ibas ngelakokenca. Bagi si I alami kita ibas kerina perdalinen gerejanta ibas perantauan enda, erbage bage tantangen ras perbeben si hadapi kita. Banci jadi, ibas situasi kegeluhen ekonomi jemaat si lamenentu rikutken propesina erkiteken tinggina tingkat persaingan ibas erbage bage bidang. Sulitna membangun ras ngurus surat izin ibadah gereja. Ketidak nyamanen ibas kita beribadah erkiteken situasi lingkungen ras sidebanna. Kecibal sibage rupana tentu mpengaruhi ku bas semangat pelayanen, pengarapen ras kinitekenta man Dibata.

Arah kata Dibata ibas kitab Juna 2: 1 – 3:3 enda, ibabai ngidah ku bas pengalamen nabi juna ibas ia ndahiken dahin pelayanen si iperentahken Dibata eme nehken hukumen Dibata man kalak kuta Niniwe. Nabi juna ertoto man Dibata, mindo perkuah ate Dibata nelamatken ia ibas kiniseranna nari. Tuhan megiken pertotonna. Dibata me ulu kegeluhen ras keselamaten Nabi Juna. Dibata kepeken dem alu keleng ate. ia labo ertaktak kerna kesalahen ras dosa Nabi Juna tapi ngalemi kegeluhenna. Setiap jelma bage pe bangsa – bangsa labo i hukumna adi nggit jera adi mindo perkuah ate Na. Dibata tetap mereken kesempaten guna jera ras empehuli hubungenna ras Dibata. Bagi NabI Juna ertoto dem alu ketutusen ras kiniteruken ukur mindo perkuah ate Dibata . Tole pe I je tangkas kel maka campur tangan Tuhan nge kalak Niniwe megiken ras tek man berita si I peseh juna.

Kita kerina eme aron Dibata ibas nehken Berita si Meriah, nehken kerina dahin pelayanen sue ras tingkatenna ibas gereja nta. Labo kepeken bias gegeh, pemeteh, pengalamen si ban ibas ndahiken dahin Tuhan e. Tapi kita membutuhken gegeh ras pasu – pasu bas Tuhan nari. Segelah seh bagi visi, misi, tujuan ras sasaran pelayanan gerejanta. Gegeh pemeteh jadi serta e me erkiten ulih arah pertotonta man Tuhan. Pertoton eme gegeh ras kegeluhen anak anak Tuhan. Arah pertoton me kita i pelimbarui, I pegegehi, I perlengkapi dingen peturah semangat ras komitmenta ibas ndahiken dahin Tuhan sue ras talenta si ibereken man banta

Ibas invocatio Galati 2: 20, Rasul Paulus ningetken: lanaibo aku si nggeluh tapi Kristus si Nggeluh ibas aku, ertina man banta segelah kerina kalak si tek e me si enggo i pelimbarui erpalasken keleng ate Kristus, ia lanai mengedepanken sura – sura ukurna secara pribadi tapi nehken sura – sura Tuhan ibas kerina kegeluhen, pendahin ras pelayanen I tengah – tengah gerejanta. Bahanlah I se kerina alu ertoto mindo penampat man Dibata. Ertotolah ibas bukuna alu kuasa Kesah.(Epesus 6:18). Erkiteken si e o senina – senina si ku kelengi, tetaplah ukurndu ula mbewat – mbewat. Mejingkatlah kam rusur ibas ndahiken dahin Tuhan, sebab I tehndu maka labo percuma dahin si dahikenndu ibas Tuhan. Amin

Pdt.Terima Tarigan
GBKP Rg. Cileungsi
Read More
Admin

Pekan Doa Sedoni wari II, Tgl 16 MEI 2016

By  
Invoctio :
Sisampat-sampatenlah kam ibas maba baban geluh enda. Alu bage isehkendu kap Undang-undang Kristus (Galatia 6:2)

Renungen : Roma 15:1-2

Tema :
Aron Dibata Si Erdiate, Ngukuri ras Mereken Kiniulin Man Teman

Ibas awal Dibata njadiken manusia iperintahkenna gelah manusia banci erdahin njaga ras nguasai (ngusahai) doni enda gelah banci mereken kemaleman ate. Dahin manusia eme guna menciptaken harmoni kegeluhen si “indah/mehuli”. Guna menciptaken harmoni kegeluhen si indah, labo banci si sada perlu teman kerja sama (Bdk. Kej. 2:18).. Dibata mereken Diberu (Hawa) man dilaki Dilaki (Adam). Dua pribadi si sangat berbeda tapi seri derazatna ilebe-lebe Dibata (duana ijadiken sentudu ras Tempas Dibata). Bage kape ibas kitab Roma enda ipersingeti kita gelah banci jadi “pasu-pasu” si mereken kemalemen ate ras damai sejahtera alu cara saling membangun (mpegegehi).

Bage me harusna kita memaknai kegeluhen ibas doni enda, si erbage-bage kecibalna (bayak, musil, sehat –sakit, megegeh-lemah, sehat –sakit, pintar-bodoh) tapi seri “ergana ilebe-lebe Dibata” janah labo banci terpesirang sada ras si debanna. Sebab perbedan e me kebayaken si ibereken Dibata guna banci kita saling mewarnai, ras melengkapi. Alu litna perbedan enda nge maka banci erdalan kai si ikataken ibas Invocationta :Sisampat-sampatenlah kam ibas maba baban geluh enda. Alu bage isehkendu kap Undang-undang Kristus

(Galatia 6:2). Sebab adi seri kita kerina labo banci si sampat-sampaten, bagi dua kalak pengisap jumpa bas halte, sada lit ibas ia isap lalit colokna, sementara perbapan sada nari lit ibas ia coclok tapi lalit isapna, wari udan ka mergeh akapna je duana, sada jemak-jemakna isapna tapi la gara, sung tamana ka ku igungna e, sung putar-putarna ka alu jari-jarina e, sung tamakenna ka kubas cupingna e, bage kape si lit colokna ndai, putar-putarna ka colokna e bas tanna e, piah dungna lit sura-sura guna nawarken bantuan, ngisap atendu silih enda colok, e mantap, kam gia ma ngisap atendu, enda isap nina, piah duana malem atena sebab banci ia enggo ngisap.

Ibas si sampat-sampaten e turah keriahendingen kemalemen ate, em ikataken surga si gundari (Present), Dari awal Dibata njadiken langit ras doni, sura-sura Dibata eme mereken “kemalemen ate (surga), Pirdaus (taman eden) eme gambaren surga si kai pe lait kurang si dema alu keriahen. Emaka adi kalak si keleng-kelengen enggo ndalanken Undang-undang Kristus “Kelengilah Tuhan Dibatandu ras kelengi temanndu manusia”

Amina pe megati ka nge ibas geluh enda, sanga kita sikap e (das bintangta) lupa ka kita kalak si meteruk, turah ka kesombongen bas kita, enggo ka kita siakap si “maka”, piah “kiniliten/kelebihen” si lit ibas kita lanai maba kiniulin tapi justru mpeturah persoalen. Bage me peristiwa ibas perpulungen Roma ibas paksa sie

Ibas perpulungen enda lit kalak Kristen si la Yahudi (Yahudiken/sila ndalani sunat), si bas ia lalit pantangen-pantangen si banci erbahan “melket/nazis), sementara lit ka kalak Kristen si murni ibas kalak Yahudi nari, si ndalani sunat, ras mantangken piga-piga pangan si banci erbahan “meluat”.
Perbedan pemahamen enda me si erbahan bas perpulungen e, terus lit perubaten, duana golongen e ngaku maka ia me si benar, dingen kinitekenna me si megegehna, kiniteken si deban lemah (golongen si kitik denga), hal si bagenda pe megati ka nge si jumpai ibas kegeluhen kinitekenta. Adi enggo ka ia ngasup erpuasa ras lanai man daging, entah lanai man dareh, iakapna kalak si la erpuasa ras man daging denga terlebih-lebih man dareh e Kristen kelas “cemen/kecil” denga.

Paulus la erbahan golongen siapai si”pas (lebih megegeh)” sebab man Paulus Roma 14:17 “Sebab ibas kinirajan Dibata, aturen pangan ras inemen labo penting. Si Penting eme perbahanen si mehuli, kemalemen ate ras keriahen si iberken Kesdah Si Badia”

Paulus ngidah duana kelompok e hebat, tapi si itekenken Paulus, apai dage kam si hebatna, kam si nentukenca, tapi adi hebat kin kinitekenndu, harus nampati kalak si merampek kinitekkna. Alu kata si deban bagi si kataken Yesus ibas Lukas 22:26 “tapi kam ula bage, kalak si mbelinna ibas kam arus jadi si kitikna, janah ise atena jadi pemimpin arus bali ras suruh-suruhen”

Ali kata si deban Paulus ngataken maka ula min “erkiteken perbahanenta ceda kiniteken kalak si deban”, sebagai contoh adi erkiteken man lomok-lomok kita maka ceda kiniteken kalak si deban, tandana megegeh kinitekenta lanai si pan lomok-lomok e.

Kalak si megegeh kinitekenna karis nggit mengalah, ema siikataken alu :
Si megegeh (Dunatos = berkuasa,mampu “power full, capable” . harus nggit nampati kalak si kote. Nampati (menanggung = basatazongangkat (to lift), maba (to bear, to carry)
Emaka ibas persadan e si perlu si lakoken e me:
1. Ula dirinta ngenca si ukur
Pinakit kalak bujur (rajin) pandangen akapna kerina kalak, sebab bagi ia e min atena kalak e kerina, adi kenca la bagi ukurna kalak e, mis kulcipen si sada. Perlu siinget maka lalit si seri ijadiken Dibata, maka kerina kita pelain-lain. Perlu si inget maka kita pe manusia si labo sempurna, emaka ula si tuntut kalak si deban bali ras kita. Jadikenlah Yesus jadi standart si man capenta ras-ras, aku ras kam harus iproses menuju kesempurnaan Kristus.

2. Harus saling mperdiateken
Lit ilustrasi si ngataken maka surga ras neraka e seri nge perlengkapenna. I surga ibas meja makan lit sendokna 2 meter, janah ibas neraka pe bas meja makanna sendokna 2 meter. Tapi adi isurga kerina sehat penghunina, tapi neraka sakit-sakiten keri dingen kertang-kertang. Adi seri nge perlengakpen i surga ras i neraka engkai maka beda jelmana is urga ras neraka. Kepeken adi isurga adi man ia bersih kerina meja makanna, sementara adi neraka adi jam man kenca enggo sontar kerina, nakan e merapen kerina. Adi surga kepeken kerina ia su sulang-sulangen emaka sada nakan pe lalit si ndabuh, sementara adi neraka kerina ia “erlumba namaken nakan ku babahna, emaka ban 2 meter sendokna, kerina kiam ku perdempaken kalak, piah terjadi perubaten, kerina enggo lumben piah kertang dingen pinakiten kerina. Kekelengenta man kalak si deban em situhuna kekelengenta man dirinta, emaka saling mperdiatekenlah.

3. Ngukuri ras mereken kai simehuli gelah erteguhna kiniteken
Ukur eme pusat kegeluhen manusia, ertina kai si ukurina em si ibelasken ras si ilakoken ibas kegeluhenna. Adi siukuri si mehuli (positif), tentu otak ras perukurenta e idemi alu si mehuli (positif). Lit kalak si menggabarken otakta enda seri rasd sada keranjang. Adi keranjang e siisi alu si mehuli maka keranjang e tetap bersih ras rapi. Tapi adi keranjang ndai iisi lau sampah, mabai bana keranjang e pe melket, mbau, mbue kuman si erbahanca turah melala bibit pinakit. Bage ka me pe perukurenta enda, adi sisisi alu si “mbau, nggesuh, sampah” la banci lang babaina kita meluat ras pinakiten. Sisi sideban ibas kegeluhen enda, kai si darami kita eme si jumpai kita, ertina ibas setiap jelma adi sidaramilah si mehulina pasti lit nge dat kita, tapi adi si darami kin kelemahenna pasti ka neg si jumpai. Mari si ukurken simehuli gelah ngasup kita mereken si mehuli,alu bage banci enteguh kinitekenta, enteguh persadanta, terciptalah sada harmoni kegeluhen si indah. Emaka mari dage sisampat-sampaten kita, ibas maba baban ngeluh enda, ula si sampet-sampeten.

Pdt. Saul Ginting
Rg. Bekasi
Read More
© Copyright 2017 GBKP Cikarang. Blogger Templates Designed by Cikarang